#Nournork គំនិតសំខាន់៤យ៉ាង ដែលពួកអ្នកមានយល់ច្បាស់ នាំឲ្យពួកគេចេះតែមានទៅៗ
ភាពស្តុកស្តម្ភនៃជីវិត គឺជាការប្រាថ្នារបស់មនុស្សគ្រប់រូប។ ប៉ុន្តែវាមិនមែនជារឿងងាយនោះឡើយ ព្រោះ បើគ្រាន់តែប៉ង តែការគិត និង សកម្មភាពមិនស៊ីទៅនឹងដំណើរឆ្ពោះទៅកាន់អ្វីដែលខ្លួនចង់បានទេ នោះការប្រាថ្នាគឺបានត្រឹមតែប្រាថ្នា។ មានន័យថា ទោះចង់បានប៉ុណ្ណាក៏អត់ប្រយោជន៍ ព្រោះវាគ្មានថ្ងៃក្លាយជាការពិត។ ខាងក្រោមនេះជាគំនិតសំខាន់ៗ៤យ៉ាង ដែលពួកអ្នកមានយល់ច្បាស់ ជាហេតុនាំឲ្យពួកគេចេះតែមានទៅៗ៖
១) មិនអាចពឹងលើប្រាក់ខែ៖ មនុស្សទូទៅប្រឹងប្រែងធ្វើការខ្លាំងណាស់ ដើម្បីទទួលបានប្រាក់ខែខ្ពស់។ ប៉ុន្តែពួកអ្នកមានមិនមែន មានលុយច្រើនដោយសារតែប្រាក់ខែនោះទេ។ លោកRobert Kiyosaki អ្នកនិពន្ធសៀវភៅ «ឪពុកអ្នកមានបង្រៀនកូនអ្នកក្រ» បានលើកឡើងថា ដើម្បីក្លាយជាអ្នកមាន គឺមិនមែនត្រូវប្រែងធ្វើការខ្លាំងដើម្បីលុយនោះទេ ប៉ុន្តែអ្នកត្រូវប្រើលុយឲ្យធ្វើការដល់អ្នកវិញ។ លោកបន្ថែមថា មនុស្សដែលមានផ្នត់គំនិតអ្នកមាន នឹងមិនពឹងលើប្រាក់ខែដើម្បីរស់ស្រួលនោះឡើយ ព្រោះពួកគេដឹងច្បាស់ថា ទោះប្រឹងធ្វើការយ៉ាងណាក៏មិនអាចរស់ស្រួលបានដែរ ពោលគឺអាចបានត្រឹមមួយគ្រប់ប៉ុណ្ណោះ ហើយដល់ពេលមួយដែលធ្វើការលែងកើត ប្រាកដជាលែងមានលុយមិនខាន។ ដោយសារតែបែបនេះហើយបានជា មនុស្សដែលមានផ្នត់គំនិតជាអ្នកមាន បានព្យាយាមគិត ធ្វើយ៉ាងណាយកលុយដែលខ្លួនមានទៅបង្កើតលុយផ្សេងទៀត ដូចជាទៅ ទិញអចលនទ្រព្យទុកលក់ ឬ ជួល បង្កើតជំនួញ និង វិនិយោគទៅលើគម្រោងផ្សេងៗ ដែលអាចនឹងចំណេញលុយបានច្រើន។
២) ចង់ក្លាយជាថៅកែ៖ បើចង់ក្លាយជាអ្នកមានពិតប្រាកដ គឺត្រូវតែហ៊ានក្លាយជាថៅកែគេ ដោយចាប់ផ្តើមមុខជំនួញណាមួយ។ រកស៊ីមិនមែនស្រួលនោះទេ ប៉ុន្តែវាជាវិធីដែលនាំទៅដល់ភាពស្តុកស្ដម្ភក្នុងជីវិត។ ដូច្នេះហើយ ពួកដែលមានផ្នត់គំនិតអ្នកមាន តែងរិះរកគំនិតថ្មីៗ ដើម្បីបើកអាជីវកម្ម ព្រោះពួកគេជឿថា គំនិតថ្មីៗនៃអាជីវកម្មទាំងនោះ នឹងជួយឲ្យការផ្លាស់ប្តូរក្នុងជីវិតរបស់ពួកគេកើតមាន។
៣) ចេះប្រើលុយអ្នកដទៃ៖ មនុស្សទូទៅតែងតែចោទសួរថា បើខ្លួនគ្មានលុយផង តើរកស៊ីយ៉ាងម៉េចទៅ? ពួកអ្នកមាន មិនមែនចាប់ផ្តើមជាមួយនឹងលុយរាប់លានក្នុងដៃនោះទេ ប៉ុន្តែចំណុចសំខាន់បំផុតនោះ គឺពួកគេចេះប្រើប្រាស់លុយរបស់អ្នកដទៃ។ បើមានគំនិត មិនចេះខ្វះទេលុយ មានន័យថា បើអ្នកមានគំនិតល្អក្នុងការរកស៊ី ឬ បង្កើតអ្វីថ្មីមួយ នោះប្រាកដជាមានមនុស្សជាច្រើនចង់ចូលរួម ដូច្នេះហើយត្រូវព្យាយាមរិះរកវិធីដើម្បីឲ្យអ្នកដទៃយល់ឃើញថា គំនិតរបស់អ្នកពិតជាអស្ចារ្យ និង ត្រឹមត្រូវ ហើយអាចចំណេញលុយបានច្រើន។
៤) ផ្លាស់ប្ដូរការគិត៖ ក្នុងលោកនេះមានលុយច្រើនណាស់ ប៉ុន្តែមានមនុស្សក៏ច្រើនណាស់ដែរដែលក្រ ។ ចំណុចសំខាន់នោះ មកពីពួកគេគិតខុស នាំឲ្យដំណើររបស់លុយ និង ដំណើររបស់អ្នកទាំងនោះបញ្ច្រាសគ្នា។ ដូច្នេះហើយ ដើម្បីក្លាយជាអ្នកមានបាន អ្នកត្រូវព្យាយាមផ្លាស់ប្ដូរការគិតរបស់អ្នកជាមុនសិន ព្រោះដោយសារតែការគិតរបស់អ្នកមិនល្អបែបនេះហើយ ទើបធ្វើឲ្យជីវិតរបស់អ្នកកន្លងមកជួបតែរឿងមិនល្អ។ ត្រូវទុកពេលខ្លះដើម្បីគិតឡើងវិញ នូវសកម្មភាពដែលខ្លួនបានធ្វើ ហើយព្យាយាមដាក់គោលដៅថ្មី និង យុទ្ធសាស្ត្រថ្មីចំពោះជីវិតទៅថ្ងៃមុខជាមួយនឹងគំនិតវិជ្ជមាន ហើយកុំភ្លេចត្រូវព្យាយាមលម្អិតអំពីវិធីដើម្បីដើរឲ្យដល់គោលដៅផង៕
For Register event 010 999 658 077 999 658 thanks
