វិធីយកឈ្នះលើការតស៊ូដើម្បីក្លាយជាសហគ្រិនអស្ចារ្យ
ការបង្កើតពាណិជ្ជកម្មជោគជ័យមួយប្រៀបដូចនឹងការឡើងភ្នំដែរ ព្រោះជាដំណើរត្រូវជម្នះឡើងទៅទីខ្ពស់ជានិច្ច ប៉ុន្តែទេសភាពមើលពីលើកំពូលភ្នំស្រស់ស្អាតមិនដូចនៅខាងក្រោមឡើយ។
ការតស៊ូជាផ្នែកសំខាន់មួយក្នុងការឡើងទៅឱ្យដល់កំពូលភ្នំ ហើយវាក៏ជាផ្នែកចាំបាច់ដែលសហគ្រិនត្រូវមានដើម្បីបង្កើតជោគជ័យដែរ។ ប្រសិនបើអ្នកសង្ស័យចំពោះសារៈសំខាន់នៃការតស៊ូ អ្នកគួរតែស៊ូខ្លួនឯងថាតើមនុស្សសុបិនចង់បានគោលដៅរបៀបណា? តើគេត្រូវការគោលដៅដែលងាយសម្រេចបាន ឬមួយក៏គោលដៅធំដែលនឹងមានផ្លែផ្កាច្រើន?
ប្រសិនបើអ្នកមានចំណង់ខ្លាំងចង់ឡើងទៅឱ្យដល់កំពូលភ្នំ និងចង់សម្រេចបានសុបិនសហគ្រិន អ្នកត្រូវចងចាំ និងអនុវត្តតាមគោលការណ៍ទាំងនេះដើម្បីពង្រឹងការតស៊ូ៖
១/ បើអ្នកមិនជម្នះដើម្បីសម្រេចទស្សនវិស័យរបស់អ្នកទេ មនុស្សផ្សេងទៀតនឹងសម្រេច
ពិភពលោកនេះសម្បូរដោយលទ្ធភាព និងមនុស្សដែលមានគំនិតអស្ចារ្យជាច្រើន ប៉ុន្តែគេមិនសូវមានកម្លាំងចិត្ត ឬការតស៊ូគ្រប់គ្រាន់ មិនមានចំណង់ និងមិនដឹងរបៀបប្រែក្លាយគំនិតល្អទាំងនោះឱ្យទៅជាការពិតទេ។ ភាគច្រើននៃអ្នកទាំងនោះបោះបង់គំនិតល្អចោលរហ័សពេក ព្រោះគេយល់ថាវាពិបាកពេក និងគួរឱ្យខ្លាចពេក ហើយគេក៏មិនបានត្រៀមចិត្តដើម្បីជម្នះឧបសគ្គដែរ។
ការពិតមួយទៀតគឺថាបើអ្នកមិនចង់ធ្វើឱ្យសុបិនរបស់អ្នកក្លាយជាការពិតទេ មនុស្សដទៃនឹងយកសុបិនរបស់អ្នក ឬគេមានសុបិនដូចអ្នកដែរ ហើយគេនឹងធ្វើឱ្យវាក្លាយទៅជាការពិតមុនអ្នក។
២/ ប្រើប្រាស់មនុស្សដែរនិយាយតែពាក្យអវិជ្ជមានឱ្យទៅជាប្រយោជន៍របស់អ្នក
មនុស្សដែលមានទស្សនវិស័យតែងតែឃើញលទ្ធភាពមុនពេលវេលាមកដល់ ព្រោះគេបានរុញច្រានព្រំដែននៃការគិតស្រមៃ និងកែច្នៃការផ្លាស់ប្តូរ។ ដើម្បីក្លាយជាមនុស្សជោគជ័យ គេត្រូវតែរក្សាសុបិនជាប់ជានិច្ច និងដើរតាមសុបិននោះបើទោះជាត្រូវឆ្លងកាត់ឧសបគ្គយ៉ាងណាក៏ដោយ។
ប៉ុន្តែការតាមសម្រេចសុបិន មិនមែនមានន័យថាអ្នកត្រូវព្រងើយកន្តើយទាំងស្រុងចំពោះមនុស្សដែលនិយាយតែពាក្យអវិជ្ជមានមករកអ្នកទេ។ អ្នកមិនត្រូវមើលស្រាលរាល់គំនិតយោបល់អវិជ្ជមានទាំងអស់ដែលអ្នកបានទទួល ព្រោះការមើលរឿងរ៉ាវអ្វីមួយពីគ្រប់ជ្រុងជ្រោយមានសារៈសំខាន់ណាស់ក្នុងការយល់ដឹង។ តាមពិតអ្នកអាចទទួលបានអត្ថប្រយោជន៍ច្រើនពីការឧស្សាហ៍ជួបនិយាយជាមួយនឹងមនុស្សដែលមើលមិនឃើញទស្សនវិស័យរបស់អ្នក ព្រោះគេអាចនឹងសួរអ្នកឱ្យពន្យល់និងវិភាគគោលដៅនិងយុទ្ធសាស្រ្តរបស់អ្នកឱ្យគេស្តាប់ ហើយក្នុងដំណើរការនេះអ្នកក៏អាចនឹងយល់កាន់តែច្បាស់ដោយខ្លួនឯងដែរ។
៣/ ទទួលយកគំនិតច្នៃប្រឌិតរបស់អ្នក
ពាណិជ្ជកម្មដែលផ្តោតលើការបញ្ចូលគំនិតច្នៃប្រឌិតក៏ជួយបានច្រើនដល់ការកែច្នៃថ្មីៗ និងមានឱកាសច្រើនដើម្បីទទួលបានជោគជ័យរយៈពេលយូរដែរ។ ប្រសិនបើអ្នកចង់ទទួលបានជោគជ័យក្នុងនាមជាសហគ្រិន អ្នកត្រូវតែទទួលយកគំនិតស្រមើស្រមៃរបស់អ្នកឱ្យបានច្រើន។
ការគិតបែបច្នៃប្រឌិតមានន័យថាអ្នកបើកការសន្ទនាអោយបានច្រើន ទទួលយកទស្សនៈផ្សេងៗ និងពិនិត្យវិភាគគំនិតដែលប្លែក។ វាក៏មានន័យថាអ្នកកំពុងតែដើរហួសពីព្រំដែននៃវិធីសាស្រ្តដដែលៗ ដែលសង្គមកំពុងតែអនុវត្ត។ ប៉ុន្តែអ្វីដែលសំខាន់បំផុតនោះគឺ គំនិតច្នៃប្រឌិតកើតចេញពីការតស៊ូ។ វាច្រើនតែកើតឡើងនៅពេលដែលអ្នកគិតរឿងអ្វីមួយដដែលៗក្នុងរបៀបផ្សេងៗរហូតដល់អ្នករកឃើញចំណុចថ្មីមួយដែលអ្នកដទៃមើលមិនឃើញ។ គំនិតដែលល្អមិនមែនស្រាប់តែកើតឡើងភ្លាមៗដោយគ្មានទាក់ទងនឹងអ្វីដែលមានស្រាប់ហើយនោះទេ ប៉ុន្តែវាជាការច្នៃប្រឌិតមួយពីលើគំនិតទូទៅ៕